Faltan 5 días

Non vos esquezades, o vindeiro luns 19 ás 19:00 horas terá lugar en Castro Caldelas a Festa dos Fachós.

A festa do lume, a festa máis enxebre e espectacular que se celebra en Galicia estaravos esperándo. Alá nos vemos.

Son un adicto ós Fachós

Si, teño que confesalo. Teño unha adicción, é a Festa dos Fachós. Que eu lembre, e dou grazas, nunca faltei a Festa dos Fachós.

Xa non é que teña adicción á festa, teño adicción a levar o fachón grande. Estaba botando contas e creo que comecei a levar un fachón dos grandes ó redor dos dez anos, cando todavía era un taponciño. dende aquelas deixei de levalo tres anos. Estes tres anos quixen ver a procesión dende a barreira e cultivar outra da miñas afeccións: a fotografía. Apenábame moito non poder portar o fachón, pero quería ter unhas fotografías da miña colleita sobre a festa (houbo un ano que ata levei o fachón e a cámara e fixen fotos, non llo recomendo a ninguén.

Hoxe quero deixarvos unhas fotos das que fixen dos anos 2003 ó 2005 a ver que vos parecen.

A mín, particularmente gústame levar o fachón grande pero ir adiante. Polo xeral vou entre os catro ou seis primeiros. Pero este ano cambiei de labor. Fun co fouciño cortando os atadixos de palla para regular a forza das lapas. Como poidéstedes ver os que asistístedes á festa as lapas fóronsenos das mans en dúas ocasións este ano. O fachón ía ardendo regularmente e con non moita forza durante a subida, pero un cambio no vento dúas veces ( na unión das rúas do Sol e Grande, e logo onda casa do Xosé do Portugués) fastidiounos a táctica que levabamos de controlalo ardendo de vagar ata chegar á Pousada Vicente Risco para a partir de aí darlle aire a tope e que as lapas levantasen uns metros. Tivemos que tira o fachón o chan dúas veces e non dimos contolado o lume pola palla adiante, polo que o tivemos que cortar, co perigo que eso conleva, xa que quedan ardendo varios metros na rúa contra as casas e pode queimarse algo ou alguén que veña detrás. Eu estiven hoxe contando os buracos que lle fixen á chaqueta por mor do lume e pasa das tre ducias. Pero un ano máis pasámolo de marabilla e mereceu a pena.

Aí vós van as fotos prometidas, espero que vós gusten.

Fachós 2008. Un éxito

Un ano máis e xa rematou a festa máis fermosa de Castro Caldelas, a festa dos Fachós. A festa das festas.

Coma todos os anos foi moita a xente que se achegou ata a vila caldelá para desfrutar desta noite tan enxebre e tan fermosa.

Pero este ano cadraba a sábado, e a cantidade de xente ata foi de máis. Había ducias de persoas de Santiago, de Vigo, da Baixa Limia, de Valdeorras, de Verín, de Ferrol, da Coruña...

Por primeira vez puiden ver ata autobuses fletados para asistir a este evento. Calcúlase que se achegaron ata a festa ó redor de 8000 persoas. Posiblemente se haxa que replantear a organización deste evento xa que é case imposible atender a tantos visitantes co sistema que hai hoxe en día.

O que sí é certo é que cada vez as persoas que nos visitan vanse máis entusiasmadas cos Festa dos Fachós.

Este ano conmigo estiveron: Méndez Romeu, Conchita Camiña, Camilo Ocampo, Raúl, Monedero, Chelis, Miguel de Petín, Juan de Montederramo, Paco Magide, Paco del Río, Fran de Piñor, etc... (seguro que me esquezo de moitos/as, pero perdoade)

Para o ano que ven, a ver si aínda sae mellor ca este ano.

Por certo, tivemos grandes apuros para chegar ata o final co fachón grande (preto de 35 m. de lonxitude)

Festa dos Fachós. A festa das festas.

O día 19 de xaneiro celébrase en Castro Caldelas unha das festas máis chamativas e vistosas do panorama festivo de España.

Non vos vou a "matar" con explicacións das súas posibles orixes, nin cousas polo estilo. Só dicirvos que que se saiba é a súa 257 edicións (xa que hai documentación da mesma dende 1750). É unha festa que aínda que cadre pola semana reúne a milleiros de persoas vidos de todos os rincóns da xeografía galega e de moitos puntos de España.

É a festa do culto ó lume por excelencia. E unha cousa moi importante hai viño, queimada e chourizos a esgalla para todas e todos os visitantes.

Cousa moi importante: o que é a celebración dos fachós en sí, a súa queima, non dura máis de 15 minutos aínda que logo hai troula ata altas horas da madrugada, polo que é convinte estar puntuais sobre as sete do serán fronte o Santuario dos Remedios.

Quedades todos e todas convidadas a festa máis bonita do Mundo. A Festa das Festas. A Festa dos Fachós.